Plantun de Prouvènço

Pèr coumpara dos planto d'encò nostre

Thapsia villosa & Aegilops cylindrica

Thapsia villosa

Apiaceae Umbelliferae

Nom en français : Thapsie.

Descripcioun :
L'erbo-à-nòu-camiso trachis dins li relarg roucaious sènso aubre. Si fueio soun pelouso sus li dos faço, 2 à 3 cop divisado e penado emé li darrié tros pulèu óuvalo. D'aquéli d'en aut, soubro pu que la guèno espesso. Lis brout de flour jauno an de 12 à 30 rai sènso bratèio e li fru soun ala e porton ges de péu.

Usanço :
La rusco de racino de sa cousino, Thapsia garganica, que trachis à l'entour de la Mar, es emplegado pèr sougna li mourdeduro de bèsti. Se fai peréu un emplastre. Sèmblo que l'erbo-à-nòu-camiso èi quàsi tant vertuouso, èi peréu di proun purgativo.

Port : Grando erbo
Taio : (0,3)0,5 à 1(2) m
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Thapsia
Famiho : Apiaceae
Famiho classico : Umbelliferae

Coulour de la flour : Jauno
Petalo : 5
Ø (o loungour) enflourejado : 4 à 6 cm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Mai à jun

Liò : Tepiero seco - Cresten
Estànci : Mesoumediterran
Couroulougi : Estenoumediterrano
Ref. sc. : Thapsia villosa L., 1753

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.